Ui Makihoi: Te Kurī

E whakairi kākahu ana a Whāea. E korikori ana ngā tamariki ki tā rātou punua kurī. Ko Māia te ingoa. Toru marama te pakeke o te punua.

Māia! Tikina! Tikina te rākau.

Ka whiu atu a Mā i tētahi peka rākau. Ka tonoa te punua kia tikina te rākau.

Tikina! Tikina atu!

Ka titiro te punua ki te rākau, ka hongihongi, ka mau, ka ngaungau haere.

Hari mai! Hari mai!

Kāore he roro o tāu kurī. Kāore ōna taringa.

Hoihoi! Mā te wā, ka tino pai.

Māku e mahi.

Ka tikina e Kina te peka rākau, ka whakaaturia ki a Māia, ka whiua atu.

Tikina! Tiki atu!

Kāore te kurī e neke.

Hmm! Tēnā pea, kei te hiakai…

Ehara! Kei te mōhio taku kurī, ko au kē tana matua, tana pōhi.

Ka uru a Tē, ka mea atu.

Māia! Tikina te rākau.

Ka whiua e te kōtiro te peka rākau. Ka auau te kurī, ka oma atu ki te tiki. Ka mau ka whakahoki atu ki a Tē. E mene ana te kōtiro.

Tino pai koe Māia. Mahi anō. Tikina atu.

Ka whiua anō e Tē te peka rākau. Ka oma tōtika atu a Māia ki te tiki, ka mau, ka whakahokia anō ki a Tē.

He kurī tino pai koe. Nē! Māia, te kurī tino ataahua.

Ka uru a Mā, ka tikina te rākau, ka whiu atu.

Tikina Māia. Tikina te rākau.

Kua tau te rākau i te taha o te pākete kākahu o Whāea. Ka oma atu te kurī ki te tiki, katahi…

Hei! Homai tēnā! Whakahokia mai.

Aue! Kua mau i a Māia tētahi kākahu.

Titiro! Kua mau i a ia tō tarau e Tē. Tō tarau iti. Hahaha!

Tino tika a Kina. E oma haere ana a Māia, ko te tarau iti o Tē kei te waha e mau ana.

Māia! Hari mai!

Oma atu Māia!

Māia! Homai! Homai!

Ka whaiwhai haere ngā tamariki i te kurī.

Te kurī! Kia mau ia! Pai kare!

Kei a au! Kei a au! Homai Māia! Homai!

E mau ana a Tē i tōna tarau. Engari, e mau tonu ana hoki a Māia.

Māia! Homai!

E taukumekume ana rāua. Katahi…tihae…

Māia! Titiro ki tō mahi! Kurī kino! Titiro!

Wī, Tē, kua pīrangi a Māia ki te mau ki tō tarau iti.

Haramai Māia! Tino pai hoki tō mahi.

(ka nui te katakata)